قصيدة عاصمة المقابر

الى ــــ عاصمة الحب والحرب والمقابر
عاصمـــــة ألمقــــــــابر

(بغداد والشعراء والصور)


حفظناهه كبل من جان اكو بغداد من جانت صــدك ونريد خاطرهه

من جانت كبل لو فكرت تغتاض ماتفزع زلم تفــزع سواتـــــــرهه

بغداد الادب والشعر والتاريــــخ كل هاي العوالم حارت بســــرهه

بغداد الحبيبه ويامعز بغــــــــداد ماضيـــها الشرف والشرف حاظرهه

ماذبت الشيله وشاهد التاريـــــخ شيلتـــهه السمه الحجبت ظاهرهه

بغداد الكريمه الماترد خطــــــار تطعم من كلبهه ومن مشاعــرهه

بغداد الاصل والاصل في بغداد اذا تزعل تدنك كل اكابــــــــرهه

نصرت يامى نصرت جم شعب مظلوم وهسه عالجرح محد يناصـــرهه

جانت بس ورد متروسه نعرف زين كــبل جانت حدايق كل اساورهه

وهسه تحولت جثه على كبر الكاع وكًيعان الوطن صارت مكابرهه

عاصمة المكابر صارت الزوراء وشضايا من الحرب صارت مناظرهه

ماظلت بيوت ولابقت بيبـــــــــان بقه بس الشرف بغداد ساتــرهــــه

وزحمه عالعروبه اتفرهدت بغداد وظل ياهو اليجي ويخــدش مشاعرهه

واذا ردنه ننشف دمعه مـــن بغداد ننشف دموعنه وينــجبر خاطـرهه

لازم نوكًفلهه ونــتـرك الـــي راح واركًاب النواصــب كــــون نبـــترهه

بغداد انسبت بس الشعر موجود وموجوده الصور بس وين شاعرهه

وموجوده المنابر بس تريد حلوكً ومو ياهو اليجي ويصعد منابــرهه

وكون ابندقيه اليكتب اعله الصار وحروف وقوافي اطك شواجـــرهه

بغداد انسبت وبجـــف الامريـــكان وتدور بالوجوه تــريد جابـــرهه

ماغمضت عين واجنبي السجـــــان مدرسة الشرف لازم نســــــميهه

عروسة كل عرس جانت كًبل بغداد وتضحك عالبواجي الماتمر بيهه

صاغت من شعبهه الراقي ترجيات بس جف الحرب كًصت تراجيهه

على صوات البلابل جانت من تنام واتاني الصـــبح ترجع تصحـيهه

هسه اعله القنابل تغفه والتفجـــــير واصوات السرف كًامت توعــيهه

ماغزر نفط بغداد عالجيــــــــــران ومقــــــابيل النفط نيران تنطيهه

نست هاي العرب من بيهه شبت نار من دم الشــــــعب جانت تطفيهه

تبآ للعروبه وعالضمير المــــــــات وكل واحـــد سكت يعتبر سابيهه

أعظم عاصمه ومادنكًت للضـــــيم تتــــشرف دول بتراب رجليهه

تعال الفتنه ردت ياعلي اترجــــــاك حرب صفين ردت لــحك عليهه

وطف ثاني رجع دحضرنه يابو حـسين ذو الفــــــقار سله وكًوم صفيهه






للشاعر المبدع علي الملا الخزاعي

مشكووووور اخي عااشت ايدك

احمد البصراوي